［請台灣的朋友原諒！因為以下情境用廣東話表達得更傳神，全篇將以廣東話書寫。］
（1）
S係ADHD仔，我平時會入去觀課，望望佢嘅覺醒狀態。如果佢已經冇油，通常我會帶佢做啲運動，或者刺激佢嘅感官，幫佢醒醒神。
S：「姑娘姑娘，我想去你嗰度打大富翁。」
我：「咩大富翁？我冇大富翁遊戲玩喎。」（心諗：你想打李嘉誠啊？我間房由始至終都冇大富翁呢個遊戲，佢講咩啊？）
S：「可以係咁打佢架，你唔記得咗？」
我：「啊！你想打不倒翁！你跟姑娘讀一次，不倒翁。」
S：「大富翁！」
（S終於去到我間房，打完一輪「大富翁」後，我諗住俾啲感官刺激泡泡佢玩。感官泡泡顧名思義，可以一次過滿足曬你嘅五感，觸感係凍，泡泡係有顏色嘅，有聲嘅，產品仲有唔同嘅水果味可以選擇。）
（我噴啲泡泡係佢雙手，佢將雙手合上）
S：「你睇吓我係度煮餸啊！」
我：（呆咗一秒，思考S嘅意思）「啊！你覺得泡泡啲聲音好似煎嘢食。」
S：「呢個係好香嘅草莓味！好好味啊！」
結語：小朋友嘅創造同幻想會嚇你一跳，我第一次聽到有人用煮餸嚟形容感官泡泡，而家諗番都幾似煎嘢食嘅「喳喳聲」。
（2）
N係新同學仔，仲適應緊香港嘅學校生活。有次，我係洗手間聽到清潔姐姐同老師嘅對話，然後N插嘴。
姐：「呢個仔唔係好聽話，要學吓規矩。」
N：「我唔係你個仔啊！」
老師&姐姐&我忍住，等N離開洗手間，我哋係度大笑。
結語：N轉數好快，我入去觀課同佢傾幾句，佢仲快過我自我介紹，已經搶先問我係邊個，我做乜係度行嚟行去。
（3）
W係ADHD，間唔中會情緒失控，大哭大叫，捐枱底，有次我入去課室幫手「救火」。W已經失控，我只好抱走佢離開課室，唔好阻住老師上堂。
（當我抱佢出去時，心諗：呢個女超輕，我竟然抱得起，而且佢冇反抗。）…
