［註：我在工作上有時遇到想離婚的夫婦，發現自己對香港家事法零認識，於是傻傻的走去進修。這裏紀錄了離婚夫婦常見的問題，結合自己平日遇到的個案，和大家分享。其實香港司法機構和律師樓網頁都有相關資訊，但我覺得用字深奧，又沒有個案例子闡述，所以這個系列的文章我會用廣東話書寫。］
問：離婚究竟要幾耐？
答：最快可以7至8個月，最耐我聽過社署嘅個案可以搞10年咁耐。
首先，大家要知道香港結婚係行註冊制，離婚就行訴訟制，所以唔係簽個名就得（咁樣設定係想大家唔好咁易離婚）。手續要搞幾耐視乎離婚係單方提出定雙方同意，有冇仔女要爭，同埋有冇資產要爭。
雙方都同意離婚，程序就簡單啲，填份表（共同申請書）交去灣仔家事法庭，之後向法庭申請暫准判令，出咗暫准隔多6個星期，就可以申請絕對判令，先至叫完成離婚程序。前提係兩夫婦就仔女同錢銀冇咩爭議，已經係份表寫清楚點樣處理，都要搞7至8個月。而家仲要加埋疫情，法庭會縮短辦公時間，所以離婚程序會搞更耐，我識得有位家長共同申請離婚，等到而家已經7個月都未有暫准，所以需時7至8個月係最少最少。
如果單方提出離婚就麻煩好多，同樣交份表（離婚呈請書）去法庭，仲要寄份表去對方屋企，對方收到再回覆法庭。既然對方唔同意離婚，咁係離婚程序上通常會表現唔合作，例如：要爭仔女同資產、然後唔上庭答辯、搞好耐都交唔出相關文件俾法庭等，所以離婚閒閒地搞幾年係唔出奇。
大家如果係婚姻上有問題，歡迎私信搵我傾談！（我唔係詛咒大家感情破裂，但遇上問題最好快啲溝通解決，否則成為雙方心裏嘅刺，就真係離婚嘅導火線。）
