［註：我在工作上遇到想離婚的夫婦，發現自己對香港家事法零認識，於是傻傻的走去進修。這裏紀錄了離婚夫婦常見的問題，結合自己平日遇到的個案，和大家分享。其實香港司法機構和律師樓網頁都有相關資訊，但我覺得用字深奧，又沒有個案例子闡述，所以這個系列的文章我會用廣東話書寫。］
問：前夫／妻拒絕見我，又唔俾我知小朋友係邊，我可以點樣阻止佢將小朋友帶離香港？
答：首先你要知道所有家事法庭嘅管養命令會有一項附註，列明雙親任何一方均無權帶同仔女離開香港，除非符合以下條件：取得法庭批准 或 取得非帶同仔女離港嘅一方書面同意。
解決方法可以要求前夫／妻將小朋友嘅旅遊證件放喺律師樓，律師承諾未經你或法庭嘅同意，唔可以交出證件。不過呢個方法有漏洞，早排我聽過有位家長想擅自帶小朋友出境探親，於是私下為小朋友報失補領證件，因而家入境處補領兒童證件並唔需要雙方父母嘅同意，結果另一方家長知道後，再次報失補領，令對方手上嘅證件失效。
仲有，你可以將法庭命令送去入境處，入境處收到資料之後，會將你小朋友放入禁止出境嘅名單，咁前夫／妻就唔能夠帶小朋友離港。我通常見係非同住家長（唔係經常照顧小朋友嘅一方，或者叫有探視權嘅一方）會將資料送去入境處，佢地真係驚同住家長隨時帶走小朋友，就一輩字再見唔到自己嘅親生骨肉。
疫情告一段落後，香港開返關，學校復辦出國交流團，平日工作會聽到小朋友因為爸爸或媽媽唔同意佢離港，佢就冇得同老師同學一齊飛，勁唔開心，有啲家長見到咁只好向家事法庭緊急申請開庭，花至少幾萬去拎法庭批准（視乎你請嘅律師幾錢一個鐘），一般法官都唔會拒絕申請，諷刺嘅係學校交流團使費只係幾千至一萬，但申請出境要使幾倍嘅錢，呢啲係高衝突父母之下小朋友嘅真實故事。
